ரியல் எஸ்டேட் வீழ்ச்சி நல்லதே!

ரியல் எஸ்டேட் வீழ்ச்சி என்பது தற்கால சூழ்லில் வரவேற்கப்படவேண்டிய ஒன்றே. ஒரு நகர் எவ்வாறு இருத்தல் வேண்டும் என்னும் தேவையை அரசு நிரவாகத்தைத்தவிர பிறர் அறிந்திருத்தல் அரிதே. அடுத்த 10, 20, 50 வருடங்களில் அதன் வளர்ச்சி எவ்வாறு இருக்கும் என்னும் கணிப்பு, அரசு ஆவணங்களின் மூலமே சாத்தியம். தனியாரும் தங்கள் அறிவைக்கொண்டு நகர் நிர்மாணத்திற்கு உதவலாம்.

சுற்றுவட்டாரப்பகுதியின் வளம், நீர்வளம், மண்வளம், நகரின் தேவையை நிறைவேற்றக்கூடிய விவசாய உற்பத்தி ஆகியவற்றை உள்ளடக்கிய பல காரணிகள் ஒரு நகரின் வளர்ச்சியை தீர்மாணிக்கின்றன. இன்று ஒருவழிப்பாதையாக பல சாலைகள் இருக்க காரணமே தொலைநோக்கற்ற தனியார் வசம் ரியல் எஸ்டேட் திறை சென்றதுதான்.

(எ.கா.) அன்று பல்லடம் தொகுதியில் ஒரு சிறு கிராமமாய் இருந்த திருப்பூருக்கு, 25 அடி சாலை விஸ்தாரமானதாய் இருந்திருக்கலாம். அன்று அரசு கோட்டைவிட்டதின் விளைவு, இன்று மாவட்ட தலைநகராய், மாநகராய் விரிந்திருக்கக்கூடிய திருப்பூரின் போக்குவரத்து நெரிசல், பூங்கா போன்ற மகிழ்விடங்களின் பற்றாக்குறை, நிழல் மரங்கள் இல்லாமை, கழிவுநீர் மேலாண்மை இல்லாமை போன்ற பல சிக்கல்களில் சிக்கித்தவிக்கிறது.
இதுவே, அரசாங்கம் முன்நின்று செய்திருந்தால், இச்சிக்கல் தவிர்க்கப்பட்டிருக்கும்.

அதேசமயம், அரசாங்கத்தின் கையில் ரியல் எஸ்டேட் இருந்தால், இடம் விற்பவருக்கும் இலாபம், வாங்குபவருக்கும் இலாபம், கருப்புபண பதுக்கல் போன்றவற்றின் மூலம் அரசு இழக்கும் வரியும் தவிர்க்கப்படும்.
விழிக்குமா அரசு?